سياسة الخصوصية

١. مين إحنا

في السياسة دي كلمة «إحنا» معناها خالتي (5alty)، وكلمة «إنت» معناها أي حد بيستخدم تطبيق من تطبيقاتنا: عميل أو طيار أو صقر أو صاحب محل أو حد من فريق محل.

إحنا المسؤولين عن بياناتك اللي بنجمعها من خلال التطبيقات، بالمعنى المقصود في قانون حماية البيانات الشخصية المصري رقم ١٥١ لسنة ٢٠٢٠.

٢. البيانات اللي بنجمعها في كل التطبيقات

الحساب والدخول

• لما تعمل حساب أو تدخل، بنطلب إيميلك أو رقم موبايلك، وبنبعتلك كود لمرة واحدة (OTP) علشان نتأكد إنه بتاعك. مفيش كلمات سر.
• الكود بيوصلك على الإيميل، أو برسالة SMS على موبايلك لما يكون الدخول بالموبايل متاح.
• علشان نحمي الحسابات من إساءة الاستخدام، بنسجل محاولات طلب الكود: الرقم أو الإيميل، ووقت المحاولة، وعنوان الـ IP وبيانات الجهاز. الكود نفسه مش بيتحفظ في السجل ده.

الجهاز والإشعارات

• لما توافق على الإشعارات، بنحفظ رمز الإشعارات (push token) بتاع جهازك، ونوع الجهاز (iOS أو Android أو ويب)، ونسخة التطبيق، ولغة التطبيق، وآخر مرة الجهاز اتصل بينا. ده علشان نبعتلك إشعارات عن طلباتك وشغلك، ونقدر نخرّج حسابك من جهاز معين لو طلبت ده.
• في تطبيق العملاء ممكن نحفظ معرّف للجهاز علشان نمنع إساءة استخدام برنامج «هات حبايبك».

سجلات الأعطال (Diagnostics)

• التطبيق مش بيبعت سجلات تفصيلية بشكل دايم. لو عندك مشكلة وفريق الدعم فعّل «السجل التفصيلي» لجهازك، التطبيق بيبعت لمدة محدودة (بحد أقصى ٧٢ ساعة) أحداث فنية زي اسم الشاشة ورسالة الخطأ ونسخة التطبيق.
• التطبيق بيشيل من السجلات دي أي رموز دخول أو أكواد أو أرقام موبايل أو إيميلات أو عناوين أو إحداثيات قبل ما يبعتها.
• السجلات دي بتتحفظ ٧ أيام بس، وبعدها بتتمسح.
• مش بنستخدم أدوات تحليلات أو تتبع إعلاني من أطراف تانية في التطبيقات.

التواصل مع الدعم ومع «خالتي»

• لما تكلم الدعم، بنحفظ رسايلك وأي صور أو ملفات بتبعتها، وملخص المشكلة، علشان نتابع معاك.
• المساعد «خالتي» جوه التطبيقات بيرد على أسئلتك. علشان يساعدك، بيقرا بيانات طلباتك وحالتها من جوه أنظمتنا. محادثاتك مع «خالتي» بتتحفظ مع حسابك علشان الدعم يقدر يكمل معاك من نفس النقطة.
• حالياً «خالتي» بيشتغل على أنظمتنا إحنا، ومحادثاتك مش بتتبعت لمزود ذكاء اصطناعي خارجي. لو ده اتغير هنحدّث السياسة دي قبلها.

الموقع (5alty.com)

• نموذج «كلم خالتي» بيطلب اسمك ورقم موبايلك وموضوع رسالتك وتفاصيلها، والإيميل اختياري. الرسالة بتوصل لنظام الدعم علشان نرد عليك.
• نموذج انضمام المحلات مكتوب في الجزء الخاص ببوابة المحلات تحت.
• لو اخترت منطقتك على الموقع، اسم المنطقة ووقت الاختيار بيتحفظوا في متصفحك بس. الموقع مش بيطلب مكانك الدقيق.
• بنحتفظ ببصمة مشفرة لعنوان الاتصال (IP) مع النماذج، علشان نقلل الإرسال المكرر وإساءة الاستخدام.

٣. تطبيق العملاء

بيانات الحساب

• اسمك ورقم موبايلك وإيميلك.
• صورة شخصية لو اخترت تضيفها.
• تاريخ ميلادك ونوعك لو اخترت تكتبهم. الاتنين اختياريين.

العناوين والموقع

• العناوين اللي بتحفظها: اسم المستلم، ورقم الموبايل، والعنوان، ورقم العمارة والدور والشقة، وعلامة مميزة، وملاحظات، ومكان العنوان على الخريطة.
• لو سمحت للتطبيق بالموقع، بنستخدمه وإنت فاتح التطبيق بس، علشان نعرف المحلات اللي بتوصل لك ونثبت العنوان على الخريطة. مش بنتتبع موقعك في الخلفية.
• الخرايط بتتحمل من OpenStreetMap، فجهازك بيطلب منهم صور الخريطة للمنطقة اللي بتبص عليها.

الطلبات والمدفوعات

• تفاصيل كل طلب: المحل، والأصناف، والأسعار، ورسوم التوصيل، والخصومات، وطريقة الدفع، والعنوان، ووقت الطلب، وحالته، وأي ملاحظات بتكتبها.
• طلبات «هاتيلي»: وصف اللي عايزه، وأي صورة بتبعتها، وعرض السعر وموافقتك عليه، وأي فرق في السعر وردك عليه.
• الدفع بيكون كاش عند الاستلام أو من محفظة خالتي. مش بنجمع ولا بنحفظ بيانات كروت بنكية.
• محفظتك: رصيدك وكل حركة عليها، سواء من كروت الهدايا أو استرداد فلوس أو كاش باك أو مكافآت «هات حبايبك» أو رصيد تعويض أو استرداد تأمين.
• التأمين (الديبوزيت) على بعض المنتجات: قيمته، ورجع ولا لأ.
• كروت الهدايا: الكارت اللي استخدمته والرصيد اللي نزل منه.
• «هات حبايبك»: مين دعاك أو مين إنت دعيته، وحالة المكافأة.

صور الاستلام والشكاوى

• لما تختار «سيبه على الباب»، الطيار لازم ياخد صورة للطلب عند الباب، والصورة بتظهر لك. ممكن الطيار كمان ياخد صورة استلام في طلبات تانية.
• لو اشتكيت من صنف ناقص أو غلط، ممكن تبعت صورة مع الشكوى.

محادثة الطلب

• لو كلمت الطيار من محادثة الطلب، بنحفظ الرسايل مع الطلب.

تتبع الطيار

• وإنت مستني طلبك، بتشوف اسم الطيار الأول ونوع مركبته ومكانه على الخريطة. رقم موبايل الطيار مش بيظهر لك.

٤. تطبيق الطيارين

• بيانات الحساب والعمل: الاسم، والموبايل، والإيميل، وتاريخ الميلاد، والرقم القومي، وصورة شخصية، وبيانات المركبة (النوع والموديل ورقم اللوحة)، ورقم الرخصة وتاريخ انتهائها، وتاريخ بداية الشغل.
• المستندات: صور البطاقة ورخصة القيادة ورخصة المركبة، علشان نتأكد منها.
• الموقع وقت الوردية: من وقت ما تبدأ الوردية لحد ما تقفلها، التطبيق بيبعت مكانك كل فترة قصيرة (افتراضياً كل ١٥ ثانية، والفترة بيحددها فريق التشغيل)، حتى والتطبيق في الخلفية. ده علشان نوزع الطلبات على أقرب طيار، ونوري العميل مكان طلبه، ونحميك لو حصلت مشكلة. لما الوردية تقفل التتبع بيقف.
• بنحتفظ بآخر مكان ليك بس، مش بسجل كامل لكل أماكنك. آخر مكان بيعتبر قديم بعد ٥ دقايق.
• الطلبات والمهام: المهام اللي اتعرضت عليك وقبلتها أو رفضتها، وأوقات الاستلام والتسليم.
• الصور: صور استلام الطلب عند العميل، وصور الأصناف والفواتير في طلبات «هاتيلي» والمشتريات.
• الفلوس: الكاش اللي معاك من الطلبات، والعهدة، والتسويات، والمشتريات، والمستحقات.
• العميل بيشوف اسمك الأول ونوع مركبتك ومكانك أثناء التوصيل بس. رقم موبايلك مش بيظهر للعميل.

٥. تطبيق الصقور

• بيانات الحساب: الاسم، وكود الصقر، والمنطقة، والموبايل، وصورة شخصية لو ضفتها.
• المحلات اللي بتسجلها: اسم المحل ونشاطه، ومكانه على الخريطة، ومواعيده، وصور الواجهة والمنيو، وبيانات التواصل مع المحل أو المسؤول فيه.
• لما تسجل بيانات تواصل حد تاني (زي صاحب المحل)، إنت مسؤول إنك تكون أخدتها بطريقة سليمة وإنه عارف إنها هتتبعت لخالتي.
• تقييمات جودة شغلك (الدقة والجودة والاكتمال) اللي فريق المراجعة بيسجلها.
• مستحقاتك وأي سلفة عليك.

٦. بوابة المحلات

• بيانات المحل: الاسم، والنشاط، والفروع وعناوينها ومكانها على الخريطة، ومواعيد الشغل، والمنيو والأسعار والصور، والعروض، والتأمين.
• فريق المحل: إيميل أو موبايل كل عضو، ودوره (مالك أو مدير أو موظف).
• الطلبات والتقارير وكشف الحساب والمدفوعات.
• لو قدمت طلب انضمام من الموقع: بيانات المحل والمسؤول، وأي صورة للواجهة بتبعتها.

٧. ليه بنستخدم بياناتك

• علشان نقدم الخدمة: نعمل حسابك، ونوصل طلبك، ونحسب السعر، ونشغل المحفظة والعروض.
• علشان نتواصل معاك بخصوص طلباتك وحسابك وشغلك، بالإشعارات والإيميل والرسايل.
• علشان الأمان: نمنع الاحتيال وإساءة الاستخدام، ونراجع الشكاوى، ونحمي الطيارين والعملاء.
• علشان نحسن الخدمة ونصلح الأعطال.
• علشان نلتزم بالقانون: الضرايب والحسابات والرد على الجهات المختصة.
• الأساس القانوني: تنفيذ الخدمة اللي طلبتها أو العقد اللي بينا، ومصلحتنا المشروعة في تشغيل خدمة آمنة، والتزاماتنا القانونية، وموافقتك في الحاجات اللي بتحتاج موافقة زي إيميلات العروض.

٨. العروض والتسويق

• إيميلات العروض مش بتوصلك غير لو وافقت عليها من «حسابي» ← الإشعارات. بنسجل إمتى وافقت وإمتى لغيت.
• كل إيميل عروض فيه رابط إلغاء الاشتراك، وتقدر كمان تقفل الموافقة من التطبيق في أي وقت.
• إشعارات العروض في تطبيق العملاء شغالة من الأول، وتقدر تقفلها في أي وقت من إعدادات الإشعارات.
• مش بنبيع بياناتك لحد، ومش بنشاركها مع معلنين.

٩. مع مين بنشارك بياناتك

بنشارك اللي محتاجينه بس، مع:

• المحلات: المحل بيشوف اللي محتاجه علشان يجهز طلبك: اسمك الأول، والأصناف، والملاحظات، ووقت الطلب.
• الطيارين: الطيار بيشوف اللي محتاجه علشان يوصل: اسم المستلم، والعنوان ومكانه، ورقم الموبايل على العنوان، والملاحظات.
• فريق خالتي: بيانات المحلات اللي الصقور بيسجلوها بتروح لفريق المراجعة.
• الجهات الحكومية والقضائية لما القانون يلزمنا، أو علشان نحمي حقوقنا أو سلامة حد.
• لو خالتي اندمجت أو اتباعت، البيانات ممكن تنتقل للجهة الجديدة بنفس الحماية دي.

مزودي الخدمات

بنشغّل التطبيقات بمساعدة مزودين بيتعاملوا مع البيانات بتعليماتنا بس، ومش مسموح لهم يستخدموها لنفسهم:

• مزود قاعدة البيانات والاستضافة وتخزين الملفات (Supabase).
• مزود استضافة المواقع والتطبيقات على الويب (Vercel).
• مزود إرسال الإيميلات.
• مزود إرسال رسايل SMS، لما تكون متاحة.
• مزودي الإشعارات: Apple وGoogle وHuawei وExpo، علشان الإشعار يوصل لجهازك.
• مزود الخرايط (OpenStreetMap) لصور الخريطة.

بعض مزودي الخدمات دول ممكن يخزنوا البيانات على سيرفرات برا مصر. في الحالة دي بنعتمد على التزاماتهم التعاقدية بحماية البيانات، وبنلتزم بشروط القانون في نقل البيانات برا مصر.

١٠. بنحتفظ ببياناتك قد إيه

• بيانات الحساب: طول ما حسابك موجود.
• الطلبات والفواتير والحركات المالية: بنحتفظ بيها المدة اللي القانون يطلبها للحسابات والضرايب، حتى بعد مسح الحساب، بس من غير ما تكون مربوطة باسمك (شوف البند ١١).
• موقع الطيار: آخر مكان بس، وبيتمسح لما حساب الطيار يتمسح.
• سجلات الأعطال: ٧ أيام.
• سجلات محاولات الدخول وسجلات المراجعة: المدة اللازمة للأمان ومنع الاحتيال.
• محادثات الدعم و«خالتي»: طول ما حسابك موجود. بعد مسح الحساب بتتقفل ومحدش يقدر يشوفها غير عدد محدود جداً من الإدارة لو فيه سبب قانوني، وكل فتح ليها بيتسجل.

١١. مسح الحساب

تقدر تطلب مسح حسابك من «حسابي» في أي تطبيق. ده اللي بيحصل:

1. بنراجع الطلب خلال ٧ أيام.
2. بعد الموافقة، الحساب بيتقفل وماتقدرش تدخل بيه.
3. فيه مهلة ١٤ يوم. لو غيرت رأيك خلالها كلم الدعم يرجعهولك.
4. بعد المهلة، بنمسح بياناتك الشخصية أو بنخليها مجهولة: الاسم والموبايل والإيميل والعناوين والصورة الشخصية والمستندات والأجهزة. الطلبات والحركات المالية بتفضل عندنا للحسابات والقانون، بس من غير ما تكون مربوطة بيك.
5. بنحتفظ ببصمة مشفرة لرقمك وإيميلك علشان نمنع استغلال مكافآت «هات حبايبك» أكتر من مرة. البصمة دي مش بترجع الرقم أو الإيميل.
6. لو سجلت تاني بعد كده، بيتعمل حساب جديد خالص من غير أي بيانات قديمة، ومن غير مكافأة «هات حبايبك» تاني.

وحسابك مقفول، ماتقدرش تطلب أو تدفع من المحفظة أو تضيف كارت هدية أو تستخدم كود أو تعدل عناوينك.

الفلوس اللي في المحفظة:

• رصيد كروت الهدايا وفلوس استرداد الطلبات بترجعلك. بيوصلك كود استرداد بيبدأ بـ RF- في التنبيه وعلى الإيميل، وبتكلم بيه خدمة العملاء علشان تستلم فلوسك.
• الكاش باك ومكافآت «هات حبايبك» ورصيد التعويض بيسقطوا ومش بيترجعوا.

إمتى الطلب بيستنى:

• العميل: لو عنده طلب لسه شغال، المسح بيستنى لحد ما يخلص.
• الطيار: لو معاه كاش لخالتي، أو عنده مهمة مفتوحة، أو فيه تسوية أو مستحقات لسه ماخلصتش.
• الصقر: لو ليه مستحقات لسه ماتدفعتش، أو عليه سلفة.

بنبعتلك إيميل أو إشعار لما الحساب يتقفل، ولو رفضنا الطلب مع السبب، ولما المسح يخلص.

١٢. حقوقك

حسب قانون حماية البيانات الشخصية المصري رقم ١٥١ لسنة ٢٠٢٠، من حقك:

• تعرف البيانات اللي عندنا عنك وتاخد نسخة منها.
• تصحح أي بيانات غلط أو ناقصة.
• تطلب مسح بياناتك، في حدود اللي القانون يطلب مننا نحتفظ بيه.
• تسحب موافقتك على أي حاجة وافقت عليها، زي إيميلات العروض.
• تعترض على استخدام معين لبياناتك.
• تعرف لو حصل اختراق أثر على بياناتك.
• تقدم شكوى لمركز حماية البيانات الشخصية.

علشان تستخدم أي حق من دول، كلمنا على info@5alty.com أو من الدعم جوه التطبيق. ممكن نطلب نتأكد من هويتك الأول، وبنرد في المدة اللي القانون يحددها.

١٣. حماية البيانات

• البيانات بتتنقل مشفرة.
• كل شخص في فريقنا بيشوف اللي شغله محتاجه بس، والعمليات الحساسة بتتسجل.
• الصور والمستندات متخزنة في أماكن مقفولة مش متاحة للعامة.
• مفيش نظام آمن مية في المية. لو حصل اختراق يأثر عليك، هنبلغك ونبلغ الجهات المختصة زي ما القانون بيطلب.

١٤. الأطفال

خدمات خالتي مش موجهة للأطفال. لازم يكون عندك ١٨ سنة على الأقل علشان تعمل حساب. لو عرفنا إن طفل عمل حساب من غير موافقة ولي أمره، هنقفل الحساب ونمسح بياناته.

١٥. تغييرات السياسة

ممكن نحدّث السياسة دي. لما نغيرها بشكل مهم، هنعرفك جوه التطبيق وهنطلب موافقتك على النسخة الجديدة أول ما تدخل. كل نسخة ليها رقم، والتطبيق بيوريك النسخة الحالية.

١٦. تواصل معانا

• خالتي (5alty)
• الإيميل: info@5alty.com
• رقم خدمة العملاء: +201222555392
• أو من «المساعدة» جوه أي تطبيق.